એસપીબી કોલેજમાં આંતરવર્ગીય મેહંદી સ્પર્ધાનું સફળ આયોજન

સાર્વજનિક એજ્યુકેશન સોસાયટી સંચાલિત એસપીબી ઇંગ્લિશ મીડિયમ કોલેજ ઓફ કોમર્સ, સુરતની સાંસ્કૃતિક સમિતિ દ્વારા તા. 17 જુલાઈ, 2026ના રોજ સવારે 10:00 કલાકે કોલેજ લાઇબ્રેરી ખાતે આંતરવર્ગીય મેહંદી સ્પર્ધાનું આયોજન કરવામાં આવ્યું હતું. સ્પર્ધામાં કોલેજની કુલ 27 વિદ્યાર્થીનીઓએ ઉત્સાહભેર ભાગ લઈ પોતાની સર્જનાત્મકતા અને કલાત્મક પ્રતિભાનું સુંદર પ્રદર્શન કર્યું હતું.
સ્પર્ધા માટે બ્રાઇડલ મેહંદી, ઇન્ડિયન ફેસ્ટિવલ અને ટ્રેડિશનલ મેહંદી જેવી ત્રણ આકર્ષક થીમ રાખવામાં આવી હતી. વિદ્યાર્થીનીઓએ થીમને અનુરૂપ વિવિધ પ્રકારની આકર્ષક અને કલાત્મક મેહંદી ડિઝાઇનો રજૂ કરી હતી. દરેક કૃતિમાં સ્વચ્છતા, સૂક્ષ્મતા, સંતુલન, સર્જનાત્મકતા અને ભારતીય પરંપરાની સુંદર ઝલક જોવા મળી હતી. સ્પર્ધા દરમિયાન સમગ્ર વાતાવરણ ઉત્સાહ અને સર્જનાત્મકતાથી છલકાતું હતું.
સ્પર્ધાના નિર્ણાયક તરીકે ડૉ. મિતાલી પટેલ અને ડૉ. દીપિકા રાવલિયાએ સર્જનાત્મકતા, થીમની રજૂઆત, ડિઝાઇનની સ્વચ્છતા, કલાત્મક અભિવ્યક્તિ અને એકંદર રજૂઆતના આધારે નિષ્પક્ષ મૂલ્યાંકન કર્યું હતું.
સ્પર્ધાના પરિણામ મુજબ તૃતીય વર્ષ બી.કોમ.ની પટેલ હીરે પ્રથમ સ્થાન પ્રાપ્ત કર્યું હતું. તૃતીય વર્ષ બી.કોમ.ની હેનીશા ચોકસીએ દ્વિતીય સ્થાન મેળવ્યું હતું. જ્યારે તૃતીય સ્થાન તૃતીય વર્ષ બી.કોમ.ની રિધ્ધિ જેઠવા, પ્રાચી પટેલ અને રિયા ભરુચીએ સંયુક્ત રીતે પ્રાપ્ત કર્યું હતું.
સાંસ્કૃતિક સમિતિના અધ્યક્ષ ડૉ. સવિતા સોંધીના માર્ગદર્શન હેઠળ સાંસ્કૃતિક સમિતિના સભ્યો ડૉ. ધ્રુવ ગાંગડવાલા અને પ્રા. રાધિકા ચાવડાએ સમગ્ર કાર્યક્રમનું સુચારુ આયોજન અને સંકલન કર્યું હતું. કાર્યક્રમ ઇન્ચાર્જ આચાર્ય ડૉ. આશિષ પંડ્યાના માર્ગદર્શન હેઠળ સફળતાપૂર્વક યોજાયો હતો.
અંતે વિજેતા વિદ્યાર્થીઓને અભિનંદન પાઠવવામાં આવ્યા હતા તેમજ તમામ સહભાગી વિદ્યાર્થીઓના ઉત્સાહ અને સર્જનાત્મક પ્રયાસોની પ્રશંસા કરવામાં આવી હતી. આવી સ્પર્ધાઓ વિદ્યાર્થીઓમાં રહેલી કલાત્મક પ્રતિભાને પ્રોત્સાહન આપવા, ભારતીય સંસ્કૃતિ અને પરંપરાગત કલાઓ પ્રત્યેની અભિરુચિ વિકસાવવા તેમજ સર્જનાત્મક અભિવ્યક્તિ માટે ઉત્તમ મંચ પૂરું પાડે છે.