રાજકોટની સબ-રજીસ્ટ્રાર કચેરીમાં આર્થિક લાભ મેળવવાના ઈરાદે પૂર્વ આયોજિત કાવતરું કરી, ઠગાઈ કરી, કચેરીમાં ગેરકાયદેસર પ્રવેશ કરી, દસ્તાવેજના કાયમી રેકર્ડમાં નુકસાન પહોંચાડી, કપટપૂર્વક ફાડી નાખી પુરાવાનો નાશ કરેલ તેમજ સરકારી કચેરીના કોમ્પ્યુટરમાં રહેલ દસ્તાવેજોના સ્કેનીંગ રેકર્ડને ડીલીટ કરી તેની જગ્યાએ ખોટા દસ્તાવેજોને સ્કેનીંગ કરીને ચડાવવાના ગુનામાં આરોપી એડવોકેટ કિશન ચાવડાની ધરપકડ સામે નામદાર સુપ્રીમ કોર્ટએ મનાઈ હુકમ આપેલ છે.આ કેસની હકીકત એવી છે કે, તા. ૧૧/૧૨/૨૦૨૪ ના રોજ અતુલભાઈ મધુભાઈ દેસાઈ-સબ રજીસ્ટ્રારનાઓએ પ્રદ્યુમનનગર પોલીસ સ્ટેશનમાં ફરિયાદ આપેલ અને ફરિયાદની હકીકતમાં જણાવેલ કે, તા. ૨૩/૦૨/૨૦૨૩ થી તા. ૧૮/૦૫/૨૦૨૪ સુધીમાં આ કામના આરોપીઓ હર્ષ સોહેલીયા ઉર્ફે હર્ષ સોની, જયદીપ ઝાલા અને કિશન ચાવડાનાઓએ ૧૭ ખોટા બનાવટી દસ્તાવેજો ઊભા કરી કોઈપણ રીતે કચેરીના કોમ્પપ્યુટરમાં રહેલ હસ્ત લેખિત દસ્તાવેજના સ્કેનિંગ રેકર્ડમાં ચડાવી મિલકત એક વ્યક્તિથી બીજી વ્યક્તિના નામે ટ્રાન્સફર કરી સબ-રજીસ્ટ્રાર કચેરીના મૂળ દસ્તાવેજી રેકર્ડનો નાશ કરી નવો દસ્તાવેજ બનાવી મૂળ દસ્તાવેજની જગ્યાએ ફેર બદલ કરેલ તેવી ફરિયાદ કરેલ.ગઈ તા. ૨૪/૧૦/૨૦૨૪ ના રોજ મામલતદારશ્રી, રાજકોટ શહેર પશ્ચિમના ઈ-ધરા ફાઈલ નં. ૩૩/૨૦૨૪, તા. ૨૨/૧૦/૨૦૨૪ નું પ્રકરણ મોજે ગામ રૈયાના સર્વે નં. ૨૭૭/૧ ના પ્લોટ નં. ૪૨ ના ગામ નમુના નં. ૨ માં દાખલ કરવામાં આવેલ નોંધ રદ્દ કરવાના કામે અરજી મળેલ હતી જેમાં આપેલ અસલ દસ્તાવેજ નં. ૧૩૦૫/૧૯૭૨ ની ખરાઈ કરવા જણાવેલ જે અંતર્ગત કચેરીના કોમ્પ્યુટરમાં સ્કેનીંગ થયેલ હસ્ત લેખિત રેકર્ડમાંથી ખરાઈ કરતા સાથે આવેલ દસ્તાવેજોની નકલ સરખાવતા, બન્ને દસ્તાવેજમાં વિસંગતતા ધ્યાનમાં આવેલ અને વધુ ખરાઈ કરતા રાજકોટ શહેરની કિંમતી કરોડો રૂપિયાની અલગ અલગ મિલકતના દસ્તાવેજોમાં વિસંગતતા જોવા મળેલ અને તેમાં મૂળ દસ્તાવેજમાં નામ છે તેનાથી અલગ નામો જોવા મળેલ જેથી આ સમગ્ર કૌભાંડ બહાર આવેલ અને જે સંબંધેની ફરિયાદ કરેલ.ઉપરોક્ત ફરિયાદના અનુસંધાને પ્ર. નગર પોલીસે આરોપીઓ સામે આઈ.પી.સી. કલમ ૪૨૦, ૪૬૫, ૪૬૭, ૪૬૮, ૪૭૧, ૪૭૭, ૪૪૭, ૧૨૦(બી), ૩૪ મુજબ ગુનો દાખલ કરેલ અને જે-તે વખતે બે આરોપીઓની ધરપકડ કરેલ અને હાલના એડવોકેટ કિશન ચાવડાએ આગોતરા જામીન અરજી કરેલ જે રાજકોટની સેશન્સ અદાલતમાં નામંજુર થયેલ. ત્યારબાદ નામદાર ગુજરાત હાઇકોર્ટમાં આગોતરા જામીન અરજી કરેલ જે પણ નામંજુર થયેલ.ત્યારબાદ એડવોકેટ કિશન ચાવડાએ નામદાર સુપ્રીમ કોર્ટમાં આગોતરા જામીન અરજી કરેલ. નામદાર સુપ્રીમ કોર્ટ દ્વારા આરોપીનો રોલ, દસ્તાવેજી પુરાવાઓ વિગેરેની હકીકતો ધ્યાનમાં રાખી આરોપીની ધરપકડ સામે મનાઈ હુકમ આપેલ છે અને વધુ સુનાવણી તા. ૧૪/૦૫/૨૦૨૫ ના રોજ રાખેલ છે તે દરમિયાન આરોપીએ પોલીસ તપાસમાં હાજર રહી સાથ-સહકાર આપવાની શરત મુકેલ છે.આ કામમાં અરજદાર આરોપી એડવોકેટ કિશન ચાવડા વતી સુપ્રીમ કોર્ટના સીનીયર કાઉન્સિલ પુર્વીશભાઈ મલ્કાણ તથા રાજકોટના પી. એમ. શાહ લો ફર્મ (મો. ૯૯૦૪૦ ૮૬૪૨૯) ના એડ્વોકેટ પીયષુભાઈ એમ. શાહ, અશ્વિનભાઈ ગોસાઈ, નિવિદભાઈ પારેખ, નિતેષભાઈ કથીરીયા, હર્ષિલભાઈ શાહ, જીતેન્દ્રભાઈ ધૂળકોટીયા, વિજયભાઈ પટગીર, ચિરાગભાઈ શાહ તથા આસિસ્ટન્ટ તરીકે રવિરાજભાઇ વાળા, ઋત્વીક્ભાઈ વઘાસીયા તથા સંજયભાઈ મેરાણી રોકાયેલા હતા.
સબ-રજીસ્ટ્રાર કચેરીના કાયમી રેકર્ડમાં નુકસાન પહોંચાડી, કપટપૂર્વક ફાડી નાખી, ચેડા કરી ૧૭ બનાવટી ખોટા દસ્તાવેજો બનાવવાના ગુનામાં વકીલની ધરપકડ સામે નામદાર સુપ્રીમ કોર્ટનો મનાઈ હુકમ
