વલસાડના જુજવા ગામે રહેતા અને બી.ડી. ડેવલપર્સના ઓથોરાઈઝ માલિક એવા બિલ્ડર બિપીન ધીરુ પટેલ વિરુદ્ધ રૂ.25 લાખના ચેક રિટર્નના કેસમાં વાપીની એડિશનલ ચીફ જ્યુડિશ્યલ મેજિસ્ટ્રેટની કોર્ટેમાં કસૂરવાર ઠરતાં મેજિસ્ટ્રેટ ઇકબાલ અહેમદ પઠાણે બે વર્ષની સખત કેદ અને ચેકથી બમણી રકમના દંડની સજા ફટકારતો હુકમ કર્યો હતો.
વલસાડના જુજવા ગામના બિલ્ડર બિપીન પટેલની વાપીના દેવાંગ દેસાઈ સાથે મિત્રતા હતી. આ મિત્રતામાં તેમણે દેવાંગ દેસાઈ પાસે પોતાના ધંધા માટે રૂ.25 લાખની રકમ હાથ ઉછીની માંગી હતી. જેના પગલે દેવાંગ દેસાઈએ તેમના પત્ની અંજની દેસાઈના ખાતામાંથી તેમને રૂ.25 લાખ 29 ઓક્ટોબર, 2022ના રોજ આપ્યા હતા. આ રકમ બિલ્ડર બિપીન પટેલે 3 મહિનામાં આપવાની હતી. જેની ઉઘરાણી બાદ બિપીન પટેલે તેમને રૂ.25 લાખનો ચેક આપ્યો હતો. જોકે, આ ચેક બેંકમાં રજૂ કરતાં તે રિટર્ન થયો હતો. જેના પગલે અંજની દેવાંગ દેસાઈએ તેના વિરુદ્ધ વાપીની એડિશનલ જ્યુડિશ્યલ મેજિસ્ટ્રેટની કોર્ટમાં કેસ કર્યો હતો.
આ કેસમાં બિલ્ડર બિપીન પટેલને તકસીરવાર ઠેરવી 2 વર્ષની સખત કેદની સજા અને બમણી રકમ એટલે કે રૂ.50 લાખનો દંડ ફટકારતો હુકમ કર્યો હતો. જેમાં જણાવ્યું હતું કે, જો દંડ ન ભરે તો વધુ 10 માસની કેદની સજા અને દંડની રકમમાંથી રૂ.25 લાખ ફરિયાદીને ચૂકવી આપવાનું જણાવ્યું હતું.
જુજવાના બિપીન પટેલે મિત્ર પાસે રૂ.25 લાખ ઉછીના લઇ ચેક આપ્યો હતો:ચેકની બમણી રકમ 50 લાખ ચૂકવવા વાપી કોર્ટનો આદેશ
