ઉમરગામ તાલુકા નિવૃત્ત કર્મચારી સેવા મંડળનું નવમું વાર્ષિક અધિવેશન યોજાયું…..

આજરોજ તા: 29- 9 2024 ના દિને ઉમરગામ તાલુકા નિવૃત્ત કર્મચારી સેવા મંડળનુ વાર્ષિક અધિવેશન ભીલાડ / સરીગામ લાયન્સ ક્લબના પાસ્ટ પ્રેસિડેન્ટ અને જી.એમ.ટી. કો-ઓર્ડીનેટર માનનીયશ્રી નરેશભાઈ સી. શાહના પ્રમુખસ્થાને ભીલાડ-પ્રાથમિક શાળાનાં પ્રાર્થના હોલમાં યોજાઈ ગયું. મુખ્ય મહેમાન પદે વલસાડ જિલ્લા નિવૃત્ત કર્મચારી સેવા મંડળના માનનીય પ્રમુખશ્રી ગણપતભાઈ પટેલ તેમજ મહામંત્રી માનનીયશ્રી પ્રવીણભાઈ પટેલ ખાસ ઉપસ્થિત રહ્યા હતા. મંચસ્થ મહાનુભાવોના વરદ હસ્તે દીપ પ્રાગટ્ય કર્યા પછી કાર્યક્રમની શરૂઆત પ્રાર્થનાથી કરવામાં આવી હતી. આ પરિવારના અકાળે અવસાન પામેલાં પરિવારના નામી -અનામી સ્વજનો, શહીદ જવાનોનાં માનમાં બે મિનિટનું મૌન પાળીને શ્રદ્ધાંજલિ અર્પિત કરવામાં આવી હતી. શાળાની બાળાઓએ સુંદર મજાનું સ્વાગત ગીત રજૂ કર્યુ હતું. “અતિથિ દેવો ભવ” ઉક્તિને અનુસરતા અશરફ ચુડાસમાએ શબ્દોથી સૌનું હાર્દિક સ્વાગત કરીને, સૌને મીઠો આવકાર આપ્ય હતો. આ અધિવેશનના પ્રમુખ માનનીયશ્રી નરેશભાઈ સી. શાહનું પુષ્પગુચ્છ, પુસ્તિકા અને શાલ અર્પિત કરી મંડળના પ્રમુખ શ્રી પરસોતમભાઈ તથા ઉપપ્રમુખશ્રી અશરફભાઈએ નરેશભાઈને સન્માનિત કર્યા હતા. વલસાડ જિલ્લા નિવૃત્ત કર્મચારી સેવા મંડળના માનનીય પ્રમુખશ્રી ગણપતભાઈ પટેલને પુષ્પગુચ્છ અર્પિત કરીને ઉમરગામ તાલુકા નિવૃત્ત કર્મચારી સેવા મંડળના માનનીય કાર્યાધ્યક્ષશ્રી વિરેન્દ્રભાઈ ભટ્ટ સાહેબે સન્માનિત કર્યા હતા. મંડળના મહામંત્રી છોટુભાઈ સી. પટેલે ગત સાધારણ સભાનો અહેવાલ રજૂ કર્યો હતો. ખજાનચી શ્રી ચંદ્રશંકરભાઈ વી.નાયકે વર્ષ 2023 – 24 નો વાર્ષિક હિસાબ રજૂ કર્યો હતો. ઉપસ્થિત સૌ કોઈએ હાથ ઊંચા કરી અનુમોદન આપ્યું હતું. મંડળના પ્રમુખ માનનીય શ્રી પુરુષોત્તમભાઈ કોળીએ વર્ષ દરમિયાન થયેલી કામગીરી અને કરવાના કામોની છણાવટપૂર્વક ચર્ચા કરી હતી. 30 જુને નિવૃત્ત થનાર કર્મચારીઓ અને રૂપિયા 325 ફિક્સ પગારે નિવૃત્ત થયેલાં કર્મચારીઓને મળવા પાત્ર તમામ લાભો માટે હાથ ધરેલ કામગીરીની સ્પષ્ટતા સાથે માહિતી પૂરી પાડી હતી. આ પ્રશ્નોનો જલ્દી ઉકેલ આવશે જ. એવી ખાત્રી સાથે સૌને થોડી ધીરજ રાખવા જણાવ્યું હતું. વલસાડ જિલ્લા નિવૃત્ત કર્મચારી સેવા મંડળના માનનીય પ્રમુખશ્રી ગણપતભાઈ પટેલે નિવૃત્ત કર્મચારીઓના પડતર પ્રશ્નો અંગે દરેક તાલુકાઓમાં થતી કામગીરીને બિરદાવી હતી. 30 જુને નિવૃત્ત થનાર તેમજ 325 માં ફિક્સ પગારે નિવૃત્ત થનાર કર્મચારીઓના પ્રશ્નો જલ્દી નિકાલ આવે તે માટેના જિલ્લા તથા રાજ્ય લેવલે થતા અથાગ પ્રયત્નોને વાચા આપી હતી. વર્ષો જુના સ્નેહીજનોને મળીને થયેલા આનંદની અનુભૂતિ ગણપતભાઈએ કરાવી હતી. અન્ય મંચસ્થ મહાનુભાવોએ પ્રસંગિક ઉદબોધન કર્યું હતું. આ અધિવેશનમાં ઉપસ્થિત 95 વર્ષના નિવૃત્ત કર્મચારી વંદનીય, વડીલ સદાશિવ નરોત્તમ કારભારી કાકા ઉપસ્થિત રહેતા સૌનાં આકર્ષણનું કેન્દ્ર બન્યા હતાં. સદાશિવ કાકાને નરેશભાઈ સી. શાહે શાલ ઓઢાડીને સન્માનિત કર્યા હતા. ઉમરગામ મંડળના કાર્યાધ્યક્ષ શ્રી વિરેન્દ્રભાઈ ભટ્ટે અધિવેશનમાં ઉપસ્થિત રહેવા બદલ સૌનો અંતરથી આભાર વ્યક્ત કર્યો હતો. રાષ્ટ્રગીતનું ગાન કરીને, અધિવેશનના પ્રમુખ માનનીય શ્રી નરેશભાઈ શાહ તરફથી આપવામાં આવેલ સ્વરૂચિ ભોજન આરોગીને, “વંદે માતરમ” “ભારત માતાકી જય” ના નાદ સાથે સૌ વિખૂટા પડ્યા હતા. સમગ્ર કાર્યક્રમનું સફળ સુંદર સંચાલન અશરફભાઈ ચુડાસમાએ કર્યું હતું.