ગ્રામ પંચાયત નારગોલ દ્વારા ઠેક ઠેકાણે કરવામાં આવી રહેલું વૃક્ષારોપણ

દક્ષિણ ગુજરાતમાં જંગલ નિર્માણ અને વૃક્ષારોપણ થકી પણ અનોખી ઓળખ ધરાવતું નારગોલ ગામની અંદર ગ્રામ પંચાયત સરપંચ સ્વીટી યતીન ભંડારીના માર્ગદર્શન હેઠળ સ્થાનિક ગ્રામજનો, સ્થાનિક સામાજિક સંગઠનો તેમજ સામાજિક વનીકરણ વિભાગ દ્વારા ચોમાસાની ઋતુમાં વૃક્ષારોપણ ઝુમ્બેશ ૨૦૨૪ અંતર્ગત અનેક ઠેકાણે વૃક્ષારોપણ કાર્ય કરવામાં આવી રહ્યું છે. કહેવાય છે કે નારગોલ ગામની અંદર છેલ્લા બે દાયકાથી વૃક્ષોની સંખ્યામાં લાખોનો વધારો થયો છે. ત્રણ વર્ષ પહેલાં ગામના તત્કાલીન સરપંચ કાંતિભાઈ કોટવાલના માર્ગદર્શન તેમજ પર્યાવરણવાદી ડો. આર.કે. નાયર દ્વારા 1.20 લાખ વૃક્ષોનું વાવેતર કરી વિશ્વનો સૌથી મોટું દરિયા કિનારેનું મિયાવકી જંગલ નિર્માણ કરવામાં આવ્યું હતું. તે ઉપરાંત દરક ઘરોના આંગણામાં આંબા, નારિયેળી, જાંબુ અને ફણસ જોવા મળે છે. ખાનગી મિલકત ખાતે પણ વૃક્ષોનું ખૂબ મોટા પ્રમાણમાં વાવેતર થયેલું છે જે જોતા નારગોલ ગામની અંદર લાખોની સંખ્યામાં વિવિધ પ્રકારના વૃક્ષો નારગોલને હરિયાળુ અને અન્ય ગામોથી અલગ દર્શાવે છે. ચાલુ વર્ષે પણ ચોમાસાની ઋતુમાં પંચાયત અને ગ્રામજનો સ્વેચ્છિક રીતે નારગોલ ગામમાં વિવિધ ઠેકાણે વૃક્ષારોપણ કરવામાં આવી રહ્યા છે. જે અન્ય ગામો માટે પ્રેરણાદાયી છે.