વલસાડ જિલ્લાના વાપી તાલુકાના કરવડ ગામમાં પટેલ ફળિયા ખાતે પિનલભાઈની ચાલમાં રહેતો ૧૪ વર્ષીય મનિષકુમાર મુકેશસીંગ સીંગ (મૂળ રહે. ચકરામી પોસ્ટ, નારણપુર, થાના બિહપુર, જિ. ભાગલપુર, બિહાર)નું તા. ૨૮ ઓગસ્ટ ૨૦૨૨ના રોજ તેના વાલીપણામાંથી કોઈ ઈસમ અપહરણ કરી લઈ ગયો હતો અથવા કોઈ કારણોસર રાત્રિના ૧૦-૩૦ કલાકે કયાંક ચાલી ગયો હતો. જે અંગે વાપીના ડુંગરા પોલીસ મથકે આઈપીસી કલમ ૩૬૩ મુજબ ગુનો દાખલ કરવામાં આવ્યો હતો. આ કેસની તપાસ એન્ટી હ્યુમન ટ્રાફિકિંગ યુનિટના ઈન્ચાર્જ પોલીસ ઈન્સ્પેકટર એસ.પી.ગોહિલને સોંપવામાં આવી હતી. જિલ્લા પોલીસ વડા ડો.રાજદિપસિંહ ઝાલાની સૂચના અને વાપીના નાયબ પોલીસ અધિક્ષક બી.એન.દવેના માર્ગદર્શન હેઠળ પીઆઈ ગોહિલે ટેક્નિકલ આધારે તપાસ કરતા મનિષકુમાર સીંગ મહારાષ્ટ્રના સીરસાદ (વિરાર) ખાતે હોવાનું જણાતા યુક્તિ પ્રયુક્તિ રીતે તપાસ કરી તા. ૨૭ જુલાઈ ૨૦૨૩ના રોજ રાત્રિના ૯-૩૦ કલાકે ઈન્ચાર્જ પીઆઈ એસ.પી.ગોહિલ, હે.કો. હર્ષદરાવ કેશવરાવ અને પો.કો. રીંકલભાઈ ગોવિંદભાઈ મહારાષ્ટ્ર પહોંચ્યા હતા. જ્યાંથી મનિષ સિંગને રેસ્ક્યુ કરી તેનો કબજો માતા પિતાને સોંપવામાં આવ્યો હતો. એક વર્ષ બાદ પુત્રનું પરિવાર સાથે મિલન થતા ભાવુક દ્ર્શ્યો સર્જાયા હતા.
વાપીના કરવડથી ગુમ ૧૪ વર્ષીય બાળક ૧ વર્ષ બાદ વિરારથી મળી આવ્યો:જિલ્લા પોલીસના એન્ટી હ્યુમન ટ્રાફિકિંગ યુનિટે પરિવાર સાથે મિલન કરાવ્યું
