ભારતની પરંપરાગત ખેત પેદાશો(શ્રી અન્ન)ની ખેતી અને તેના ઉપયોગને પ્રોત્સાહન આપવા માટે વડાપ્રધાનશ્રી નરેન્દ્રભાઈ મોદીની હિમાયતના પગલે સંયુક્ત રાષ્ટ્રએ વર્ષ-૨૦૨૩ને આંતરરાષ્ટ્રીય મિલેટ વર્ષ ઉજવવાનું નક્કી કર્યું છે. જેના અનુસંધાને વલસાડ જિલ્લા પંચાયતની આઈસીડીએસ શાખા દ્વારા જિલ્લા કક્ષાનો “શ્રી અન્ન”(મિલેટ્સ) સ્પર્ધા કાર્યક્રમ યોજાયો હતો.
જિલ્લા કક્ષાના શ્રી અન્ન (મિલેટ્સ) સ્પર્ધા કાર્યક્રમમાં જિલ્લાના સેજા અને ઘટક કક્ષાએ મિલેટ્સમાંથી બનતી સ્પર્ધામાં પ્રથમ ક્રમે નાગલીની બરફી, દ્વિતિય ક્રમે નાગલી- જુવારના મુઠીયા અને તૃતિય ક્રમે મિલેટ્સ રાજસ્થાની ખીચડી બનાવનાર આંગણવાડી કાર્યકરોને વિજેતા તરીકે જાહેર કરવામાં આવ્યા હતા. આ વિજેતાઓને જિલ્લા કલેક્ટરશ્રી ક્ષિપ્રા આગ્રે, જિલ્લા વિકાસ અધિકારીશ્રી મનિષ ગુરવાની, પ્રાયોજના વહીવટદારશ્રી અતિરાગ ચાપલોત અને નાયબ જિલ્લા ચૂંટણી અધિકારી ઉમેશ શાહ દ્વારા આંગણવાડી કાર્યકરોને પ્રોત્સાહિત કરી પ્રમાણપત્ર અને ઇનામ વિતરણ કરવામાં આવ્યું હતું. આઇસીડીએસ શાખાના પ્રોગ્રામ ઓફિસર નિલમબેન પટેલ દ્વારા મિલેટ્સના મહત્વ વિશે સમજ આપવામાં આવી હતી.
આંગણવાડી કાર્યકરો દ્વારા શ્રી અન્ન (મિલેટ્સ)માંથી બનાવેલી ૩૦ પ્રકારની અલગ-અલગ વાનગીઓ જેવી કે નાગલી- જુવારના મુઠીયા, કોદરીની ખીચડી, મિક્ષ મિલેટ્સ રોલ્સ, મિલેટ્સ હાંડવો, નાગલીની બરફી, શીરો, મિલેટ્સ રાજસ્થાની ખીચડી, બિસ્કિટ વગેરે જિલ્લા કક્ષાએ યોજાયેલ મિલેટ્સ સ્પર્ધામાં મૂકવામાં આવી હતી.
જિલ્લા આરોગ્ય શાખાના આર.સી.એચ.ઓ. ડો.એ.કે.સિંઘ, મદદનીશ શિક્ષણ નિરીક્ષક નીકિતાબેન પટેલ, જિલ્લા ખેતીવાડી અધિકારી એ.કે.ગરાસિયા, અતુલ ફાઉન્ડેશનના પ્રતિનિધિ અદિતિ આચાર્ય અને આરોગ્ય શાખાના પી.એ. ન્યુટ્રીશન સ્નેહલ બાર્ગજે દ્વારા નિર્ણાયક તરીકે સેવા આપવામાં આવી હતી.
વલસાડ જિલ્લા કલેકટર ક્ષિપ્રા આગ્રેની ઉપસ્થિતિમાં જિલ્લા કક્ષાનો “શ્રી અન્ન”(મિલેટ્સ) સ્પર્ધા કાર્યક્રમ યોજાયો
