ક્ષય દર્દીઓ માટે સુરત જિલ્લા પંચાયત અને જિલ્લા ક્ષય કેન્દ્ર-સુરતના સરાહનીય પ્રયાસો

આરોગ્ય કર્મચારીઓ દ્વારા વર્ષ ૨૦૨૨-૨૦૨૩ દરમિયાન સુરત જિલ્લા ગ્રામ્ય વિસ્તારના ક્ષયના દર્દીઓ માટે સરકાર દ્વારા મળતી સહાય ઉપરાંત લોકભાગીદારીથી દર્દીઓની મૂળભૂત અને આવશ્યક જરૂરિયાતો પૂરી કરવા માટે વિશેષ કામગીરી કરવામાં આવી છે. ૧૦૦ જેટલા દાતાશ્રીઓના સહયોગથી એપ્રિલ-૨૦૨૨ થી એપ્રિલ-૨૦૨૩ દરમિયાન છેલ્લા એક વર્ષમાં ૨૦૦૦ જેટલા જરૂરિયાતમંદ ક્ષયના દર્દીઓને કુલ ૬૦૦૦ જેટલી પોષણયુક્ત આહારની કીટ પૂરી પાડવામાં આવી છે. જેની પ્રતિ કીટનો દર અંદાજે રૂ. ૭૫૦/- થી રૂ. ૨૦૦૦/- છે.
ક્ષયની બીમારી થયા બાદ દર્દીની શારીરિક કાર્યક્ષમતા ખુબ જ ઓછી થઈ જાય છે. જે પરિવારોમાં મુખ્ય કમાનાર વ્યક્તિ ક્ષયગ્રસ્ત થાય તો તેના પરિવારોની આર્થિક પરિસ્થિતિ કફોડી બને છે. આ બાબતને ધ્યાને લઈને મુખ્ય જિલ્લા આરોગ્ય અધિકારીશ્રી ડો. અનિલ પટેલ, જિલ્લા પંચાયત આરોગ્ય શાખાના માર્ગદર્શન હેઠળ, જિલ્લા ક્ષય કેન્દ્ર-સુરતના જિલ્લા ક્ષય અધિકારીશ્રી ડો. દિનેશ વસાવા અને આરોગ્ય કર્મચારીઓના વિશેષ પ્રયત્નોથી પોષણયુક્ત આહારની કીટ વિતરણના ઉમદા કાર્યમાં સફળતા હાંસલ થઈ છે. પરિણામે ક્ષયના જે દર્દીઓ હતાશા અનુભવી રહ્યા હતા, તેઓમાં ઝડપથી સ્વસ્થ જીવન જીવવા માટેનો ઉમંગ જોવા મળ્યો છે.