ગાંધીનગરમાં ચીલોડા પોલીસે ધોળાકુવાના રીઢા બુટલેગરની રાજસ્થાનથી મંગાવેલ વિદેશી દારૂના જથ્થાથી ભરેલી ઈકો કાર સાથે ધરપકડ કરી છે. તેની સાથે પોલીસે અન્ય એક શખ્સને પણ પોલીસે ઝડપ્યો છે. તેની પાસેથી કાર અને દારૂના જથ્થો મળી કુલ રૂ. 3.51 લાખનો મુદ્દામાલ જપ્ત કરાયો છે. આ મામલે પોલીસે વધુ કાર્યવાહી હાથ ધરી છે.
કારમાં સીટ નીચે ગુપ્ત ખાનું બનાવી તેમાં દારૂનો જથ્થો સંતાડેલો હતો
મળતી માહિતી મુજબ, ચીલોડા પોલીસની ટીમ પેટ્રોલિંગ કરી રહી હતી ત્યારે બાતમી મળી હતી કે, એક સફેદ કલરની ઇકો ગાડીમાં ચોર ખાનું બનાવી તેમાં વિદેશી દારૂનો જથ્થો સંતાડીને માધવગઢ ગામ તરફથી સાદરા ગામના અંદરના માર્ગેથી ગાંધીનગર તરફ લઈ જવાઈ રહ્યો છે. આથી બાતમીના આધારે પોલીસે સાદરા ગામ સરકારી દવાખાના નજીક વોચ ગોઠવી હતી. દરમિયાન ત્યાંથી શંકાસ્પદ ઇકો ગાડી પસાર થઈ હતી. પોલીસે કારને રોકી ચાલકની પૂછપરછ આદરી હતી. ચાલકે પોતાનું નામ નિર્ભયસિંહ રાજપૂત અને તે મૂળ રાજસ્થાનનો હોવાનું જણાવ્યું હતું. ત્યાર બાદ પોલીસે ગાડીની તપાસ કરતા સીટ નીચે ગુપ્ત ખાનામાં સંતાડેલી વિદેશી દારૂની અલગ-અલગ બ્રાન્ડની 78 બોટલો મળી આવી હતી.
દારૂની ડિલિવરી લેવા ઊભેલા બુટલેગરને પોલીસે ઝડપ્યો
આથી પોલીસે કારચાલકની વધુ પૂછપરછ હાથ ધરી હતી. કારચાલકે જણાવ્યું કે, તેને આ જથ્થો મૂળ રાજસ્થાનના ઉદેપુરના દેવીસિંહ સિસોદિયાએ આપ્યો હતો અને ધોળાકુવાના મુકેશ ઠાકોરને આપવાનું કહ્યું હતું. સાથે કારચાલકે જણાવ્યું હતું કે, આગળ મુકેશ દારૂના જથ્થાની ડિલિવરી લેવા માટે ઊભો છે. આથી પોલીસે નિર્ભયસિંહને સાથે રાખીને ચીલોડા તરફ જતાં સાદરા જીઈબી પાસેથી મુકેશ ઠાકોરને પણ ઝડપી લીધો હતો. પોલીસે કુલ 47 હજારથી વધુની કિંમતનો દારૂ, બે મોબાઈલ તેમ જ ઈકો કાર મળીને કુલ રૂ. 3.51 લાખનો મુદામાલ જપ્ત કરી કાયદેસરની કાર્યવાહી હાથ ધરી છે. મુકેશ પર અગાઉ પણ દારૂની હેરાફેરી, વેચાણ અને મારામારી સહિતના ગુના નોંધાયેલા છે.
