વડોદરાના વાઘોડિયામાં કોઈ ગોઠિયો મસાલાના સેલ્સમેનના ટેમ્પોની કેબિનમાંથી રૂ.1.17 લાખની રોકડ લઈને ફરાર થયો છે. આ મામલે સેલ્સમેને વાઘોડિયા પોલીસ સ્ટેશનમાં ફરિયાદ નોંધાવી છે. ફરિયાદ બાદ પોલીસે ગુનો નોંધી સીસીટીવી ફૂટેજના આધારે ચોરને પકડવા માટે ચક્રો ગતિમાન કર્યા છે.
પોલીસ ફરિયાદ મુજબ, વડોદરાના મકરપુરા રેલવે સ્ટેશન પાસે આવેલી તુલસીગ્રીન સોસાયટીમાં રોનકભાઈ પટેલ પરિવાર સાથે રહે છે. રોનકભાઈ એક મસાલા કંપનીમાં સેલ્સમેન તરીકે નોકરી કરે છે અને જિલ્લાના વિવિધ ગામોમાં આવેલી નાની-મોટી દુકાનોમાં મસાલાના ઓર્ડર લેવાનું અને ડિલિવરી કરવાનું કામ કરે છે. દરમિયાન, રોનકભાઈ વાઘોડિયામાં એક દુકાનમાં મસાલાની ડિલિવરી આપવા માટે ગયા હતા. દરમિયાન તેમની પાસે અન્ય દુકાનોમાં કરેલ ડિલિવરીના બિલના નાણાં પણ હતા.
ઓર્ડરનો ચેક લેવા ગયા ત્યારે ગઠિયો પાકિટ ઉઠાવી ગયો
28 ફેબ્રુઆરીના રોજ બપોરના સમયે જ્યારે રોનકભાઈ વાઘોડિયા લાઇબ્રેરી પાસે આવેલી એક દુકાનમાં ઓર્ડરનો ચેક લેવા ગયા હતા ત્યારે દુકાન બહાર પાર્ક કરેલા ટેમ્પોના કેબિનમાંથી કોઈ ગઠિયો તેમનું પાકિટ લઈને ફરાર થયો હતો. પાકિટમાં બિલ કલેક્શનના રૂ.1.17 લાખ રૂપિયા રોકડા હતા. આથી રોનકભાઈએ વાઘોડિયા પોલીસ સ્ટેશનમાં આ અંગે ફરિયાદ કરી છે. પોલીસે સીસીટીવીના આધારે આરોપીને પકડવા ચક્રો ગતિમાન કર્યા છે.
